ʻŌLELO HAWAIʻI I ENGLISH
ʻŌLELO HAWAIʻI I ENGLISH
Ma ka pūʻulu ʻelua o ka pūkaʻina puke ʻepekema Hawaiʻi ʻo Pāhana ʻĀina Lupalupa (PʻĀL), paipai ʻia nā keiki e nānā ka maka, e hoʻolohe ka pepeiao, a e kilo me nā lonoa a pau. Kilo ʻia nā ua, nā makani, a me nā ao e wānana ai ke keiki i ke anilā. Hoʻopaʻa ʻia nā ʻōlelo noʻeau a me nā hōʻailona o ka honua e maopopo ai i ke keiki ke ʻano o ka ʻāina a me ka wā e kanu a ʻohi ai. Maopopo i ke keiki ke ʻano o ke kai a me ka wā e holoholo ai. Aʻo ʻia no Pele a me nā mele Pele i ʻike ke keiki i ke ʻano o nā luaʻi pele a me ke kahe ʻana o ka pele. Aʻo ʻia no ka hiki ʻana mai o nā meaola i Hawaiʻi a me ka loli ʻana o ia mau meaola a i ʻōiwi o Hawaiʻi nei. Maopopo i ke keiki ka pilina o nā meaola me ka ʻāina a me ke kuleana nui o kākou, nā kānaka, e hoʻomalu a e mālama i nā meaola a me ka ʻāina ʻo Hawaiʻi.
He hoa hele kahi Puke ʻIke Kahua ʻEpekema no kēlā me kēia ʻope puke e hoʻohālikelike ai i ka heluhelu maikaʻi ʻana; e nānā pū ka makua me ke keiki, ke kumu me ka haumāna i ka manaʻo ʻepekema a manaʻo Hawaiʻi nui o loko o ka ʻope; e noʻonoʻo a e kūkākūkā i nā nīnau koʻikoʻi; e aʻo mua i ka ʻike pohihihi e ʻike hou ʻia ana ma nā puke pae heluhelu; a e aʻo i kekahi ʻike Hawaiʻi hou aku.
He pūkaʻina puke ʻepekema Hawaiʻi ʻo Pāhana ʻĀina Lupalupa (PʻĀL) nāna e hoʻomākaʻikaʻi i nā mea heluhelu ma kekahi huakaʻi ʻimi naʻauao i nā kaiapuni like ʻole o Hawaiʻi. Mai nā nahele o uka e kākua ana i ka noe a hiki i ke kai uluwehiwehi, e pā ana kēlā kihi, kēia kihi i ka mea heluhelu. E launa ana kāu keiki me ka puʻu koa, ka pāoʻo, ka wiliwili, a ia meaola ʻāpaʻakuma aku, ia meaola ʻāpaʻakuma aku. No Hawaiʻi pae ʻāina wale nō lākou; ʻaʻole loaʻa ma kekahi ʻāina a puni ka honua. E hiaʻai ana ka manaʻo o ka ʻimi loa i nā kiʻi luaʻehu a me nā ʻōlelo piha ʻike. E paʻa ke kahua ʻike Hawaiʻi o ka mea heluhelu ma ka ʻōlelo a me ka moʻomeheu Hawaiʻi.
